 |
| ကျိုင်းတုံထောင်တွင် ကိုမင်းကိုနိုင်နှင့် အစ်မဖြစ်သူ ဒေါ်ကြည်ကြည်ညွန့် ထောင်ဝင်စာတွေ့စဉ်။ |
ရှမ်းပြည်နယ် ကျိုင်းတုံထောင်၌ ထောင်ဒဏ် ၆၅ နှစ် ချမှတ်ခံထားရသည့် ၈၈ မျိုးဆက် ကျောင်းသား ခေါင်းဆောင် ကိုမင်းကိုနိုင်သည် ဆိုးရွားသည့် ရာသီဥတုကြောင့် ခြေလက်များ ကိုက်ခဲသည့် ဒဏ်ကို ပြင်းထန်စွာ ခံစားနေရကြောင်း မိသားစုဝင် တဦးက ပြောသည်။
ကိုမင်းကိုနိုင်၏ အစ်မဖြစ်သူ ဒေါ်ကြည်ကြည်ညွန့်က “သံတိုင်တွေ ကြားက လေက ၀င်တယ်၊ ရာသီဥတုက အရမ်းအေးတော့ ရေခဲ သေတ္တာထဲ ၀င်နေရသလို ဖြစ်တယ်လို့ ပြောတယ်”ဟု ပြောဆိုသည်။
ကျိုင်းတုံထောင် ထောင်အာဏာပိုင်များက ထောင်ပရ၀ုဏ် ကျဉ်းမြောင်း လွန်းသည်ဆိုသော အကြောင်း ပြချက်ဖြင့် ကိုမင်းကိုနိုင်အား အပြင်ထွက် လမ်းလျှောက်ခွင့်၊ လေ့ကျင့်ခန်း လုပ်ခွင့် မပြုကြောင်း၊ ထို့ကြောင့် အခန်းအတွင်းမှာသာ နေထိုင်ရကြောင်း ဒေါ်ကြည်ကြည်ညွန့်က ဆက်လက် ပြောသည်။
ကိုမင်းကိုနိုင်မှာ ၁၉၈၉ ခုနှစ် ပထမအကြိမ် စစ်တွေထောင်၌ ထောင်ဒဏ် ၁၆ နှစ် ကျခံခဲ့ရစဉ်က ရရှိခဲ့သည့် အရိုးကျီးပေါင်း တက်သည့် ရောဂါကိုလည်း ခံစားနေရကြောင်း၊ ယခု တကြိမ်တွင်လည်း ဝေးလံသည့် ကျိုင်းတုံထောင်သို့ ပို့ခဲ့သည့်အတွက် မိသားစုမှ သုံးလ တကြိမ်သာ ထောင်ဝင်စာ သွားရောက် တွေ့နိုင်ကြောင်း ၎င်းက ဆက်လက်ပြောသည်။
ပြီးခဲ့သည့်လအတွင်းက ဘူးသီးတောင်ထောင်တွင် နှစ်ရှည်ထောင်ဒဏ်ကျခံနေရသည့် ၈၈ မျိုးဆက် ကျောင်းသားခေါင်းဆောင် ကိုဌေးကြွယ်၏ မိခင် ကွယ်လွန်သည့် သုံးနှစ်ပြည့် နှစ်လည်ဆွမ်းကျွေး တရားနာပွဲတွင် မြန်မာ့ဒီမိုကရေစီ ခေါင်းဆောင် ဒေါ်အောင် ဆန်းစုကြည်မှ ကိုမင်းကိုနိုင်၏ အစ်မ ဒေါ်ကြည်ကြည်ညွန့် အပါအ၀င် နိုင်ငံရေးအကျဉ်းသား မိသားစု ၇၀ ခန့်ကို တွေ့ဆုံ၍ အားပေး စကား ပြောဆိုခဲ့သည်။
ထိုတွေ့ဆုံပွဲတွင် ဝေးလံသည့် ထောင်များတွင် နှစ်ရှည်ထောင်ဒဏ်များ အသီးသီးကျခံနေရသည့် ၈၈ မျိုးဆက် ကျောင်းသားများ၏ အခြေအနေကို သိရှိပါကြောင်း၊ မိသားစုအနေဖြင့်လည်း ဆက်လက်၍ ကြံ့ကြံ့ခံသွားစေလိုကြောင်း၊ ဒီမိုကရေစီအရေးကိုဆက်လက် အားပေးစေလိုကြောင်း ဒေါ်အောင်ဆန်းစုကြည်က ပြောဆိုခဲ့သည်။ (ဧရာဝတီသတင်းမှ ကောက်နှုတ်ဖော်ပြသည်။)
No comments:
Post a Comment