 |
| ပြည်သူ့ခေတ်ဂျာနယ် |
မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည် ရေးသားထားသော ခရီးသွား ဆောင်းပါးကို ပြည်သူ့ခေတ် ဂျာနယ်တွင် ပထမဆုံး အကြိမ်အဖြစ် ဖော်ပြ ခွင့်ပြုလိုက် သောကြောင့် ကြိုတင်မှာယူမှုများ ရှိနေသည့်အပြင် ဒေါ်အောင်ဆန်း စုကြည်နှင့် တွေ့ဆုံမေးမြန်းခန်းကို ၂၃ နှစ်အတွင်း ပထမဆုံးအဖြစ် Messenger ဂျာနယ်တွင် ခွင့်ပြုလိုက်ကြောင်း သတင်းရရှိသည်။
၂၀၁၀ ပြည့်နှစ် နှစ်ကုန်ပိုင်း ဒေါ်အောင်ဆန်းစုကြည် နေအိမ်အကျယ်ချုပ်မှ လွတ်မြောက်ပြီးနောက် ပြည်တွင်း သတင်းမီဒီယာများ အားလုံးက ဒေါ်အောင်ဆန်း စုကြည်နှင့် တွေ့ဆုံမေးမြန်းခန်းများ ပြုလုပ်ခဲ့ကြကြောင်း၊ သို့ရာတွင် အဆိုပါ တွေ့ ဆုံမေးမြန်းခန်းများကို စာပေစိစစ်ရေးက ဖော်ပြခွင့်မပြုခဲ့ဘဲ စက်တင်ဘာလ ၄ ရက်နေ့ထုတ် Messenger ဂျာနယ်တွင် စိစစ် ဖြတ်တောက်၍ ဖော်ပြခွင့်ပြုလိုက်ခြင်း ဖြစ်ကြောင်း အဆိုပါ ဂျာနယ်မှ တာဝန်ရှိသူတဦးက ပြောသည်။
“အင်တာဗျူးက မနှစ်ကတည်းက လုပ်ခဲ့တာပါ။ ၂၀၁၀ ဒီဇင်ဘာကတည်းက စိစစ်ရေးကို တောက်လျှောက် တင်ခဲ့တယ်။ ၁၀
လလောက် ကြာမှ ဖော်ပြခွင့်ပြုတာပါ။ နိုင်ငံရေးနဲ့သက်ဆိုင်တဲ့ အကြောင်းအရာတွေကို အားလုံး ဖြတ်တောက်ပြီးမှ ဖော်ပြခွင့် ပေးခဲ့တယ်။ လူငယ်နဲ့ ပတ်သက်တာတွေပဲ ခွင့်ပြုပါတယ်။ အင်တာဗျူးရဲ့ ၇၅ ရာခိုင်နှုန်းလောက်က ဖြတ်တောက်ခံခဲ့ရ ပါတယ်” ဟု ၎င်းက ဆိုသည်။
ဒေါ်အောင်ဆန်းစုကြည်ဓာတ်ပုံနှင့် အင်တာဗျူးပါဝင်သော Messenger ဂျာနယ် ထွက်ရှိလာသောအခါ ရန်ကုန်ရှိ ဂျာနယ် အရောင်းဆိုင်များတွင် ဂျာနယ်ဝယ်မရတော့သည်အထိ ဝယ်လိုအား ထိုးတက်သွားကြောင်း ဂျာနယ်ဖြန့်ချိရေးနှင့် အရောင်းဆိုင်များမှ သိရသည်။
“ပြုံးရွှင်နေတဲ့ ဒေါ်အောင်ဆန်းစုကြည်ရဲ့ မျက်နှာကို ပုံကြီးချဲ့ထားတာ ပါလာတာနဲ့ လူတွေက အလုအယက် ၀ယ်တယ်။ Messenger က သိပ်အရောင်းမသွက်တော့ ကျနော့်ဆိုင်မှာ နည်းနည်းပဲမှာတာ။ ဒေါ်အောင်ဆန်းစုကြည် အင်တာဗျူးကြောင့် မနက် ဆိုင်ဖွင့်ပြီး နာရီဝက်အတွင်း ကုန်သွားတယ်။ မေးတဲ့သူ များလွန်းလို့ ထပ်မှာတယ်။ လုံးဝ မရတော့ဘူး။ စောင်ရေ ပြတ်သွားပြီလို့ ဂျာနယ် ဖြန့်ချိရေးတွေက အကြောင်းပြန်တယ်” ဟု တာမွေ မြို့နယ်အတွင်း ဂျာနယ်အရောင်းဆိုင်ပိုင်ရှင် တဦးက ပြောသည်။
လမ်းဆုံလမ်းခွများတွင် ဂျာနယ်လက်ပွေ့ ရောင်းသူများကမူ ဒေါ်အောင်ဆန်းစုကြည် အင်တာဗျူးပါသော ဂျာနယ် ၀ယ်ယူသူ များလွန်းသည့် အတွက် ပုံမှန်ထက် ဈေးတင်ရောင်းချခဲ့သော်လည်း ရှိသမျှ ရောင်းချ၍ ကုန်သွားသည်ဟု သိရသည်။
“ပုံမှန်ဈေးက ဂျာနယ်တစ်စောင် ၆၀၀ ကျပ် ရောင်းတာ။ ဒေါ်အောင်ဆန်းစုကြည် အင်တာဗျူးပါတော့ တစောင် ၈၀၀ အထိ ဈေးတင် ရောင်းတာလည်း ၀ယ်ကြတာပဲ” ဟု ရွှေဂုံတိုင်မီးပွိုင့်တွင် ဂျာနယ်ရောင်းချသူ လက်ပွေ့သမားတဦးက ဆိုသည်။
အင်တာဗျူးတွင် ဒေါ်အောင်ဆန်းစုကြည်က လူငယ်များ မိမိတို့၏ အနာဂတ်အတွက် ကြိုးစားအားထုတ်ကြရန်နှင့် လူ့တန်ဖိုးသည် ငွေကြေးလည်း မဟုတ်သကဲ့သို့ ရုပ်ဝတ္ထု ပိုင်ဆိုင်မှုလည်း မဟုတ်ကြောင်း ပြောဆိုထားသည်။
စက်တင်ဘာလ ၆ ရက်နေ့တွင် ဖြန့်ချိမည့် ပြည်သူ့ခေတ် ဂျာနယ်တွင်လည်း ဒေါ်အောင်ဆန်းစုကြည် ရေးသားထားသော ပုဂံခရီးစဉ်အကြောင်း ဆောင်းပါးကို ဖော်ပြခွင့်ပြုလိုက်ရာ ကြိုတင် မှာယူသူ များပြားနေကြောင်း ဂျာနယ်အရောင်းဆိုင် များမှ
သိရသည်။
“အင်္ဂါနေ့ထွက်မယ့် ပြည်သူ့ခေတ်ဂျာနယ်မှာ ပါလာမယ့် ဒေါ်အောင်ဆန်းစုကြည်ရဲ့ ဆောင်းပါးနဲ့ ပုဂံသွားတုန်းက ရိုက်ထားတဲ့ ဒေါ်အောင်ဆန်းစုကြည် ဓာတ်ပုံတွေကို ပုံကြီးချဲ့ပြီး ဂျာနယ် ကြော်ငြာ ပိုစတာ ဗီနိုင်းကြီးတွေ ထုတ်ထားတယ်။ ဆိုင်တွေ အားလုံးမှာ အဲဒီ ပိုစတာဗီနိုင်းတွေ ချိတ်ထားတော့ လူတွေက ဂျာနယ်မထွက်ခင် ကတည်းက ကြိုမှာကြတယ်” ဟု မရမ်းကုန်း မြို့နယ် သမိုင်းလမ်းဆုံတွင် ဂျာနယ်ရောင်းချသူ တဦးက ပြောသည်။
ရန်ကုန်အခြေစိုက် သတင်းထောက်တဦးကမူ စာပေစိစစ်ရေးသည် နိုင်ငံရေးနှင့် ပတ်သက်သော ဒေါ်အောင်ဆန်းစုကြည်၏ သတင်းများကို ကန့်သတ်မှုများ ပြုလုပ်ပြီး သတင်းဂျာနယ်များတွင် မဖော်ပြနိုင်ရန် ပိတ်ပင်မှုများ ပြုလုပ်နေဆဲ ဖြစ်သည်ဟု
ရှင်းပြသည်။ (ဧရာဝတီ )
No comments:
Post a Comment